عاشتوا كي راكم دايرين إن شاء الله راكم كاع بخير وهانيين وفرحانين، كي راكم دايرين مع الصحة؟ كي راهي دايرة خيتي؟ عندك القناطر تاع البيتزا جبتها لك اليوم، شوفي تكلي وتمدي الجوارين. واحد بيتزا ما كان لها.
أنا درت زوج كيسان حليب دافي، غرفة ونص خمارة، غرفة سكر، زوج حبات بيض، وخمس مغارف زيت. إذا درتي كاس حليب، ديري ثلاث مغارف زيت. خلطي مليح.
لمي الباكريكة تاعك بالفرينة، ديري فتحة ملح، ومن بعد زيدي غرفة عامرة مارغرين، ونص باكي خمارة تاع الكاتو إذا كانت عندك، وإذا ما كانتش عادي.
لمي عجينتك مليح حتى تولي طرية. شوفوا كيفاش تجي، وباش تولي مقرمشة من التحت ما تحتاجيش سميد.
هذه العجينة إذا خدمتوها في الطلبيات راح تعجب الزبائن بزاف.
بعدها دخلي غرفة كبيرة دهن في الزلافة، دلكي العجينة مليح، غطيها وخليها تخمر.
أنا اليوم رايحة ندير ميني بيتزا بلا لحم، بلا دجاج، بلا تون، غير سهلة. ديري اللي تحبي: شاورما، دجاج، ولا أي حشوة.
أنا درت غير الصوص والفرماج.
بالنسبة للصوص، درت أربع مغارف كبار طماطم مصبرة. كي تبغي تستعمليها، ذوبيها شوية، ومن بعد زيدي عليها جوج سنينات ثوم مرحيين، ثلاث مغارف زيت، شوية هريسة، رشة سكر، وخليها تطيب على نار هادئة حتى تعقد.
في الأخير زدت رشة زعتر، وطفيت عليها، وفرغتها في كاسرونة باش تبرد، ما خليتهاش في المقلة.
العجينة كي تخمر، قطعيها كويرات متساويين. إذا عندك ميزان استعمليه، وإذا ما عندكش عادي. يخرجو حوالي ثلاثين كورة.
شعلي الفرن يسخن مليح. رشي في الصينية شوية زيت، ما تكثريش، غير طبقة خفيفة باش تجي البيتزا مقرمشة من التحت.
بسطي كل كورة غير بزوج صباع في الوسط، وخلي الحواف غلاظ شوية.
ثقبي الوسط بالشوكة، دهني بالصوص، زيدي الفرماج الشيدر، وفرماج آخر إذا حبيتي، وزيتون.
طيبيها حوالي عشرين دقيقة حتى تتحمر من التحت، وتبقى طرية من الفوق.
من بعد إذا حبيتي مرري عليها شعلة خفيفة باش تتحمر أكثر.
تجي شابة، بنينة، ومقرمشة، والله تشهي.
الحمد لله، جربيها اليوم بالصحة والراحة، وإن شاء الله تعجبكم. 🌹