واش من بريوش؟ بريوش خفيف، مقطن، ومفشفش. سموا بالله، بسم الله، ونصلوا على النبي محمد صلى الله عليه وسلم.
اليوم جبت لكم وصفة جديدة في قناتنا "أم عبد النور للطبخ والتصوير". جيبي قصعة وحطي فيها كاس ونص حليب دافئ، وكيس خميرة، وثلاث ملاعق سكر حسب الذوق. إذا تحبي البريوش حلو زيدي السكر، وإذا ما تحبيش الحلاوة بزاف نقصيها.
زيدي بيضة، وربع كاس زيت، واخلطي مليح. من بعد زيدي الفرينة تدريجياً، وكيس خميرة الحلوى، والفانيلا، ورشة ملح، ولمي العجين.
ما كثرناش الزيت في العجين لأننا راح نستعمل الزبدة في التوريق، وهي اللي تعطيه النكهة والطراوة.
واصلي العجن حتى يتحصل على عجينة طرية وتلصق شوية باليد. إذا احتاجت زيدي حوالي 50 غرام زبدة طرية وكملي العجن حتى تولي ناعمة.
خلي العجين يخمر حتى يتضاعف حجمه، ثم قسميه إلى كويرات حسب الحجم اللي تحبيه. تقدري تعمري بعضها بالشوكولاتة، وتخلي البعض الآخر بدون حشو.
حلي كل كرة بيدك فقط، بدون مدلك، وحطي الحشو إذا حبيتي، ثم لفيها.
رصي الحبات في الصينية، وغطيها وخليها تخمر مرة ثانية حتى تنتفخ مليح.
ادهني الوجه بصفار بيضة مع شوية حليب، وإذا حبيتي رشي كاكاو أو زينيها حسب الرغبة.
أدخليها فرن مسخن مسبقاً، وطيبيها على نار متوسطة حتى تتحمر من الفوق والتحت.
بعد ما تخرج من الفرن، خليها تبرد شوية، ثم زينيها بخطوط الشوكولاتة أو رشي عليها السكر الناعم.
النتيجة بريوش خفيف، مفشفش، قطني، يرجع لشكله كي تضغطي عليه بيدك، ويبقى طري حتى لليوم الثاني والثالث.
جربي الوصفة وإن شاء الله تعجبكم، وتهلوا في رواحكم بزاف.
