ها الجديد🚨بعجينة وحدة و كاس حليب تحمري وجهات قدام عجوزتك و حماتك😌ميني سندويتش و ميني بانيني بننة😋
اليوم جبتلكم وصفة راح تعجبكم بزاف، تقدري ديريها لدارك تاكلي منها مع وليداتك وتشبعوا كامل، وإذا حبيتي حتى تديها معاك للشاطئ ولا للنزهة تكون خفيفة وبنينة.
ما نطولش عليكم الهضرة، ونبداو على بركة الله. بسم الله، وصلوا على سيدنا محمد صلى الله عليه وسلم.
حضرت كاس حليب دافئ، أضفت له ملعقة كبيرة خميرة الخبز، ملعقة كبيرة سكر، وملعقة كبيرة فرينة، خلطتهم مليح وغطيته وخليته يتفاعل.
بعدما تخمرت الخميرة، ضفت بيضة، وربع كأس زيت، ورشة ملح، ونصف كيس خميرة الحلوى، ثم أضفت الفرينة تدريجياً حتى تحصلت على عجينة طرية ومتجانسة، وعجنتها مليح وخليتها تخمر.
بعدما تضاعف حجمها، قسمتها إلى كويرات وزن كل واحدة حوالي 40 غرام، باش نوجد ميني ساندويتشات وميني بانيني.
حليت كل كرة برفق، بدون ما تكون رقيقة بزاف، وشكلتها على حسب النوع اللي حبيت نديره. بعد ذلك رصيتهم في الصينية، وغطيتهم وخليتهم يخمروا مرة ثانية.
دهنت الوجه بالبيض، وزينتهم بالسانوج والجنجلان، ثم دخلتهم للفرن. خليتهم يطيبوا من التحت، وبعدها شعلت عليهم من الفوق حتى تحمروا بلون ذهبي جميل.
من بعد خرجتهم وغطيتم بسرفيتة نظيفة باش يبقاو طريين وما يقساوش.
أما بالنسبة للحشو، استعملت صدر دجاج مطحون، أضفت له الملح، الفلفل الأسود، السكنجبير، الكركم، الكاري، الثوم المطحون، معدنوس، وجوج مغارف سميد رطب أو شابلور، وإذا توفر الفرماج زيديه، وإذا ماكانش استعملي ملعقتين زيت أو ملعقة دهن.
خلطت كامل المكونات مليح، وشكلتهم على شكل أصابع صغار أو حسب الرغبة، ثم فورتهم في الكسكاس حتى طابوا، وبعدها قليتهم قليلاً في الزيت حتى تحمروا.
بعدها عمرت الميني ساندويتشات والميني بانيني بهذا الحشو، وقدمتهم ساخنين، وخرجوا بنينين وخفاف.
إذا حبيتي تبداي مشروع صغير، أنصحك تبدئي بشوية. في البداية طيبي لدارك، وصوري خدمتك، وعمري صفحتك بأعمالك أنت، ما تستعمليش صور الناس.
كل مرة زيدي وصفة جديدة، وصوريها بطريقة جميلة، وخدمي على صفحتك بصبر واستمرار.
المشروع في بدايته ممكن تكون فيه خسارة، وهذا شيء عادي، لكن مع الوقت والصبر والخدمة راح يجيك الرزق بإذن الله.
ما تستسلميش إذا واجهتك صعوبات، كل واحد يطيح ويعاود ينوض، والنجاح يحتاج صبر واجتهاد.
ربي يرزقكم جميعاً من واسع فضله، ويوفق كل وحدة حابة تبدأ مشروعها، وإن شاء الله تنجحوا كامل.